چون گل نوروز کند نافه باز

نرگس سرمست درآید به ناز

امیرخسرودهلوی

سال 1402 تاچندروزدیگر،به پایان می رسد.

درسالی که گذشت ،چه کردیم وچه برما گذشت؟

خوب بودیا که بد؟!

تلخ بود یا که شیرین؟!

هرچه بودگذشت ......

سال نو درپیش است .....

افکارپوسیده را ، نو کنیم .....

ذهنمان را بهاری کنیم ......

با دوست داشتن ، زندگی کنیم .....

چراکه ،زمان درحال گذرانست ......

شادباشیم و شادی را هدیه کنیم ....

مهربورزیم تا به ما مهربورزند .....

قاصدک های خبررسان ، شکفتن گل های زیبا، صدای گوش نوازپرندگان .....همه وهمه نشانگرآمدن بهارند......

به بهارسلام کنیم وسال نورا با زیبااندیشی آغاز کنیم ....

سال 1403 خورشیدی پیشاپیش برهمه ایرانیان ایران زمین ، هرجا که هستند،همایون باد

نوشته سولمازشریفی

کاش می شد خنده را تدریس کرد

کارگاه خوشدلی تاسیس کرد

کاش می شد صداقت را معنی کرد

کاش می شد اعتمادرا رنگی زیبا داد

کاش می شد عشق را تعلیم داد

کاش می شد ناامیدان را امید داد

کاش میشد شادی را سرود

کاش میشد شادمانی را ستود

کاش میشد با نشاط بود

با نشاط دیگران دلشاد بود

کاش می شد دشمنی را سربرید 

کاش می شد درخت دوستی را کاشت

کاش می شد دوستی را پاس داشت

کاش می شد پشت پا زد برغرور

دورشد ازخودپسندی دوردور

کاش می شد باصفا ویکد دل بود 

همچو آب زلال ، ساده وشفاف بود

کاش می شد از دورنگی ، ریا پرهیز کرد

کاش می شد خرم وساده زیست

کاش می شد بذر کینه وبددلی ،دورریخت

کاش می شد انسان ، انسان بود

نوشته سولمازشریفی

بازدید کننده عزیز اگربه زبان آذری آشنا نیستین ، لطفا ازدوستان آذری خود یاری بگیرین مرسی

اشعاری از استاد کریمی مراغه ای

شیطان نامه

خیر اولا شیطانی گوردوم گئجه

خلقدن ایلوردی شکایت منه

گیچدوق اوتوردوق ایکیمیز کافه ده

حالتینی ایتدی حکایت منه

سویلدی شاعر سنه وار خواهیشیم

چوخ عرفائیله اولوب گردیشیم

عفو ایله بیردفعه دوشوبدور ایشیم

من یازیقام ایله حمایت منه

آخ نیه خلق ایلوری لعنت منه

*******

آدمی خلق ایتدی خدای کریم

ایلمدیم سجده من اولدوم رجیم

سوز اوزانیب ایندی اولوب بیر سیجیم

دائم ایدیر حمله بو ملت منه

آخ نیه خلق ایلوری لعنت منه

*******

منکه بولاردان جانیم ال چکمیشم

شیطنتین بوخچاسینی بوکموشم

بیرجه کیمین بالدیزینی س...شم

بیر بله ایلولل ه اذیت منه

آخ نیه خلق ایلوری لعنت منه

*******

رشوه نی مین مین قاهاروب خان یسین

نفع ربانی حاجی ترخان یسین

تهمتینی بس نیه شیطان یسین

داغدان آغیر گلدی بو منت منه

آخ نیه خلق ایلوری لعنت منه

*******

آدمه من ایلمدیم سجده گر

واریدی صلبنده سنون تک بشر

ایندی اولوبدور هامی بیر پارچا شر

قالدی یالاندان بو اهانت منه

آخ نیه خلق ایلوری لعنت منه

*******

اوستادی خلق ایندی تاپولماز ناشی

چیخمیا تا مکر و حیل دن باشی

هرکس اولوبدور اوزی شیطان باشی

هیچ ایشه ورمولل ه دخالت منه

آخ نیه خلق ایلوری لعنت منه

*******

تابع نفس اولمیسوز ای فکری خام

مین جور اویوندان چیخیسوز صبح و شام

مفته منی متهم ایلور عوام

قویمامیسوز ذره جه فرصت منه

آخ نیه خلق ایلوری لعنت منه

*******

کبلایی آرتوق آلیر اسگیک ساتور

گونده ساری یاغه نباتی قاتور

پیس پیس اوتانمور ایله قالخور یاتور

لعن ایدیر از روی حماقت منه

آخ نیه خلق ایلوری لعنت منه

*******

پیس بولوسوز گر منی ای زنجلب

آخ نه دوشوبسوز دالیما داوطلب

سیز کی تانیر سیز منی یا للعجب

بس نیه ایلورسوز اطاعت منه

آخ نیه خلق ایلوری لعنت منه

*******

من بابا پیغمبریدیم بیر زمان

طاعت ایدردی منه جان ابن جان

رتبه می آرتیردی خدای جهان

ویردی اوز عرشینده سکونت منه

آخ نیه خلق ایلوری لعنت منه

*******

گوی ده نه اجالیله اهل سما

صف چکوب ایلردی منه اقتدا

آخری بیر کلمه نین اوسته خدا

ایلدی تنبیه و سیاست منه

آخ نیه خلق ایلوری لعنت منه

*******

ایتدی تکبر منی خار و ذلیل

چیخدی الیمدن او گوزل سلسبیل

طولی چکوب سجده مین اوغلوم مین ایل

حق اوزی ورمیشدی فضیلت منه

آخ نیه خلق ایلوری لعنت منه

*******

سیز اله بد ذاتسوز ای بدخصال

آدمی خلق ایتدی حق ذوالجلال

اولدی وجودی منه وزر و وبال

اولدی اونون خلقتی نقمت منه

آخ نیه خلق ایلوری لعنت منه

*******

سجده نی من ایلمدیم آدمه

سیز ایدیسوز سجده بنی آدمه

آدیوز اسلامدی با این همه

سیز نه بشر سوز گنه رحمت منه

آخ نیه خلق ایلوری لعنت منه

*******

سیز ده هله یوخدی او شان و مقام

خلقه انا الله دیورسوز ای عوام

تخت ریاستدن اوتور صبح و شام

اللشوب ایلیرسوز عداوت منه

آخ نیه خلق ایلوری لعنت منه

*******

لاپ گده بیر یول یمیسوز غیرتی

عصمتی حیثیتی شخصیتی

بیر بیره قاتدوز کیشینی عورتی

د گسین اوغول سیزدکی غیرت منه

آخ نیه خلق ایلوری لعنت منه

*******

هاردا دیدیم من بو خانیم قیزلارا

خوش بزنه وسمه چکه فر قویا

مرثیه لرده گتوره مین ادا

بوشلادا بسدور بو لجاجت منه

آخ نیه خلق ایلوری لعنت منه

*******

آخ نه دوشوبسوز دالیما عمر و زید

ایستمرم من بابا سیز تک مرید

آی گده لاپ سیز منی ایتدوز یزید

سیزدن اوغول چیخمادی امت منه

آخ نیه خلق ایلوری لعنت منه

*******

جامعه ده بللی دیور مسلکوز

مذهب اسلامده یوخ مدرکوز

یوز منی وطی ایلیسوز هر تک تکوز

ایتمیسوز هر حیلده سبقت منه

آخ نیه خلق ایلوری لعنت منه

*******

نفسیوه تنبیه ایله اوغلوم بالا

من دیورم بانقانی آل قات بالا

دوش قاباغا هر نه گلور قارمالا

باس اوروجی ایله شماتت منه

آخ نیه خلق ایلوری لعنت منه

*******

من هاچان ایتدیم بو قدر انقلاب

هاردا قمار اوینادیم ایچدیم شراب

مفتضح ایتدوز منی ای بی حجاب

وردوز عجب بوللی خسارت منه

آخ نیه خلق ایلوری لعنت منه

*******

گه منه ملعون دیوسوز گه شرور

عکسیمی گه شل چکیسوز گاهی کور

گاهی گورورسوز یوخودا مثل حور

هیچ یاراشور گور بو شباهت منه

آخ نیه خلق ایلوری لعنت منه

*******

تاپ او کریمینی سحر ای پسر

سویله بوگفتاری اونا سر بسر

منع ایله سین خلقی او نیکو سیر

ایلمسون لعن جماعت منه

آخ نیه خلق ایلوری لعنت منه

*******

بعضی صفت لر گورورم آشکار

هیچ بیری منده یوخیدی سیزده وار

قانمامیسوز غیرت و ناموس و عار

پیس پیس ایدیر سوز هله لعنت منه

آخ نیه خلق ایلوری لعنت منه

 

زشت و زیبا

وئرمیشم طاقت و آرامیمی ای یار سنه***عاشقم عاشقم ای دلبر عیار سنه

سوه رم بزم اولا خلوت قویاسان من ائلیم***دردیمی محنتیمی غصه می اظهار سنه

گزه رم کوچه و دربندی دالونجا سوخارام***پیچاقی قارنینا هر کس ائده آزار سنه

ایستی وقتینده سویونسان سالارام تئز ایچینه***کاسه نین بوز وئره رم شربت گلنار سنه

گل اوتور قوزا قیچون گییدیریم ای یار سنه***هرنه سویسن جوراب و چکمه و شلوار سنه

نیه آوجوندا سیخورسان ازیسن سیندیریسان***نیلیوب آخ بو یازیق قلب وفادار سنه

سن یخیل بالش ناز اوسته اوزان منده چالیم***ضرب و قارمان و کمانچه، ویلن، تار سنه

اگمه شاخ ساخلا یانوندا باخوب اوپ قوی گوزیوه***بو گوزل عکسی که مندن قالور آثار سنه

دوگمه سین آچ آرالا ساخلا قویوم اورتاسینا***آلمیشام ساک دولوسی،حیوا،لیمو،نار سنه

عیبی یوخ اینجیمه ویش ویش دئمه قوی تئز چیخادوم***سیخسا باشماق ایاقون اولسا اگر دار سنه

دوز بیر آز بندین آچوم تا وئریم الآن الیوه***چتریوی وئرمیه زحمت بو یاغیش قار سنه

گله سن باغدا وئرم بیر الیوه اویناداسان***قرمزی آلما ، شمامه ، گل بی خار سنه

ال ایاق چالما چالیشما نئجه دوتسان گئچه جاق***دئمه خاطر قویاجاق چرخ جفاکار سنه

احتراماً دایارام آغزیوا سنده سوراسان***سولی قلیانی کریمی دییر اشعار سنه

چهارشنبه سوری

قیش چیخدی گزیر کوچه نی بو تازه جوانلار***یوخ یوخ نه جاوان درس تمدن اوخویانلار

چون مدرسه قورتولدی چیخوب ائیله تماشا

چارراه خیاباندا دوشوب گؤر نئجه غوغا

قیزلار کی چیخور مدرسه دن خیلی دل آرا

نازیله گئدیر منزله گویا که مارالدی***بیردن گوروسن آتدیلار بمب رنگی سارالدی

بو بوینی یوغون قانمور اوشاقدور چوخی قورخار

یا حملی وار آرواددی جانیم زحمتی آرتار

یا تریکی دور نعشه قاچار معرکه قالخار

ظاهرده محصلدی اوزی اهل کمالدی***لیکن کافی تشبیهدی لاب مالدی که مالدی

چارشنبه سوریده اولوبدور بئله مرسوم

بو رسملری واجب ائدوبدور ننه کلثوم

تصدیق ایلیوب چوخلارینی زینب پاشا مرحوم

بیر ساعت اوتور دقتیله ائیله تماشا***بیر بیر او یازان رسملری ائیلیوم انشاء

اولسون شب چارشنبه گرکدور هامی دلشاد

چیخسونلار داما قیز گلین اوغلان کیشی آرواد

هر دامدا گرگ اود یانا اولموش بئله ایجاد

قیزلار اونون اوستوندن او ساعتده آتیلسون***اما آتیلاندا دییه جاق بختیم آچیلسون

دامدان ائیله کی اندیلر قورتولدی تماشا

بیر مجمعه خوش شب چره ائیلر مهیا

خورما یمش ایگده سوجوق و فخری و حلوا

بیر عده خانیم قلبیده بیر نیت ایده لر*** گیزلینجه قولاق آسماقا جدیت ایده لر

شال ساللاماقا بعضی ایدر شوقیله رغبت

باغلاللار انون شالینه هر شیدن اوساعت

خوش یمن اولار گر دولما پیشیرسه شاما آرواد

شامدان صورا بیر آز بادام اویناللا یاتاللار***آرواد کیشی هر تک تکی مقصوده چاتاللار

بخشی از اشعار سفر نامه بانه

ساقلئقئمدا منی یاد ائت اخوی*** من اولندن سورا جئرما یَخَوی

ساقلئقئمدا منی دیندیر دیلیلن*** گلمه ترحیمیمه  تاج گولیلن

ساقلئقئمدا الیوی چک باشیما*** یاخما بورنون زئلئغن باش داشیما

تا وارام اوزمه الیمدن، الیوی*** نه قرا گیر؛ نه اوزاد سقلووی

قوی یانیئم من سنه سنده منه یان*** سن منه جان دی؛ دیگیم من سنه جان

سالالما قبریمه شالوار؛ باقووئ*** دایاما بوگرومه س..؛ دا… وئ

دیلیم اولسیدئ پوزاردئم تاقووی*** الیم اولسیدئ کسردیم آقووئ

ساقلئقئمدا قولووی بوگنوما سال*** گاهی گاهی بوسولان گونلومی آل

هئش گلیب قبریمه یاد ایتمه منی*** باشیما چالما غلط فاتیحه نی

قالاما شمعیله  تونقال  گو… مه*** اولموشم؛ یاخمامئشام بال گو..مه

کاش گورکان قویا قبریمه دلیک*** منیله دفن اولا بیر جانلی چلیک

او آداملار کی گلیر فاتیحیه *** ساقلئقئمدا منه چیخمازدئ ئییه

اوزادئدیم کفن آتدان چلیگی*** زور وئریدیم گنلردی دلیگی

بابا ساقلئقئدا منیم گول اؤزؤمه*** مشتری اول سوزؤمه هم اوزؤمه

منی تشویق ائله خلعت لریله*** گونلومی شاد ائله دعوت لرله

نه یالاندان چپی، قه قه لریله*** مرسی، احسن، یاشا، به به لریله

ائل گرک قیمت اشعاری بیله*** نیه ایراندا گرک شاعیر اوله

صنعت شعری چکیلر فیسادا*** دوشدی بازاری فیصاحت کاسادا

بیر غزل کی گلیر عشقیله باشا*** کیم آلئر بیر غزلی بیر لاواشا

سعدی، حافیظ، بابا طاهر، خیام*** سحرین ائتدی  ناهارسئز اخشام

کیمدی گیگدی اگنینه قیمتدی قبا*** سالمادئ چیگنینه بیر تازه عبا

شهریارین ادی دیللرده گزیر*** تازه حیدر بابا اللرده گزیر

بیر کیچیک ائوده گونون وئردی باشا*** قالدئ بیر مانقالئ بیر حوقا ماشا

ای خدا وئر بیزه عقلیله شعور*** شاعری ائلمیک زینده به گور

آنا دیلیم گوزلدی

دولوب محببتون ای شوخ و دلستان دیلیمه*** آلیب قراریمی الدن وئریب توان دیلیمه

كمان قاشون، گؤزون، اوخ كیپریگون، ساچین گؤزه لیم *** آتیر كمند، چكیر یای گئدیر نشان دیلیمه

آلاولی سینه مین آهی وجودیمی كول ائدر***اگر سو سپمسه بو چشم خونفشان دیلیمه

یوخومدو چاره دایاننام همیشه چم خمیوه *** ولی باتیرمیاسان طعنیله تیكان دیلیمه

گتیر جمالیوی قوی سینمه قادان جانیما *** سرین سرین نفسونله سو سپ یانان دیلیمه

نه قدری گیزله دیرم درد عشقی سینه مده *** دیلیمده جوشه گلیر غم اولور روان دیلیمه

می الستله مستم نه آبدستله پست***كی دگمه ییب الیمه جام و استكان دیلیمه

آنا دیلیم ائله شیریندی جاندان ایسته ملی***آچاندا من دیل آنام چوخ دئییبدی جان دیلیمه

دیلیم شیریندی عسلدن اودور كی غم یئمه رم***اگر وورا آریلار نیش هر زامان دیلیمه

منم او ترك، كی آدیم غزللرین دوزودو*** من آذر اوغلویام آذر وئریبدی جان دیلیمه

منم او ترك، بخارئیله سمرقندی*** باغیشلاییبلا قرا خالیمه ماتان دیلیمه

منم او ترك، كی غربتده اللی ایل یاشارام ***تجاوز ائیله مز اهواز و اصفهان دیلیمه

منم او ترك، كی دالدان چیخاردارام دیلینی*** قاهاررام انگینی هر كیم دیسه یامان دیلیمه

منم او ترك، سوزوم جمله سوزلرین گوزیدو*** سوزوم اوزوم كیمی دوز، باغلاما یالان دیلیمه

دیلین فضیلتی یوخدور ملاك تقوادی*** گئد اوز كمالیوه گول گولمه ای فلان دیلیمه

یقول اكرمكم عند ربّی اتقاكم*** قویوب پیمبر اكرم گوزل بیان دیلیمه

همیشه امر به معروف دور منیم هدفیم***اگر كومك لیق ائده حیّ لامكان دیلیمه

منافقه دئیرم ال گوتور بو تفرقه دن *** گولوب محاسینیمه یازما داستان دیلیمه

گلین وئره ك ال اله دشمنین قازاق كوكونو*** یئتیرمه زهریلی عقرب كیمی زیان دیلیمه

“كریمی” ام دیلیمی رایج زامان ائده رم ***توجّه ائتسه آقام صاحب الزّمان دیلیمه

قارقا ینن بولبولون موکالیمه سی

قارقا بیر گون ائدیردی گلشنی سئیر***گؤردو بیر بولبولو قفسده اسیر

اؤزونو هی وورور اویان بویانا***بلكه آزاده پر چالوب دولانا

بوشلییوب ایستراحتی چابالیر***ائشیگین عطرینی قفسدن آلیر

باخیر سیملرین آراسیندان***گلیر شوره ، دل یاراسیندان

قارقا عرض ائتدی ای پرنده عشق***ای اولان شاه عشقه بنده عشق

ندی تقصیرون ای وفا كانی***سنی ارباب ائدوبدو زندانی

بو نظافت بو سس بو نوطقو بیان***سنه جانا ، روا دگول زیندان

دیدی بولبول كه ای پرنده شوم***اََولیندن بئله اولوب مرسوم

قالا زینداندا عندلیب و هَزار***اولا آزاد كركس و لشخوار

سن كی سرقتده اولموسان مشهور***قارقاروندان جهانیان منفور

چؤرگی دسمالیلا جازلورسان ***صابینی تاخجادان آلازلورسان

پنیری سفره دن ووروب قاچیسان***گردكان گورجگین قاپوپ اوچوسان

شانسووا چیخسا پاك یا ناپاك***داراشیرسان ، كی سنده یوخ امساك

طینیتون پست و نییتون می شوم***مسلكون مذهبون دگول معلوم

سنی آزاد ائدوب بو چرخ دنی***قفس غمده ساخلیوب دی منی

دوتولان دیللره صفادی دیلیم***لیك اؤز باشیما بلادی دیلیم

گئجه گوندوز اسیر زندانم ***بودی جورموم كی خوش سخنرانم

هركسین نوطقو وار فصاحتی وار ***قلم آتشینی قدرتی وار

گرك اولسون همیشه زیندانی ***چئخا زنداندا عاقیبت جانی

ای كریمی ندور بو طول كلام ***مجلسی لنگه وورما ایله تمام

اوصاف مراغه

 خوشامراغه و گلگشت باغ وبستانش خوشا نسیم دل انگیز صبحگاهانش

خطا بود که تفرج کنان به باغ شوی شبیه می نکنی گر بباغ رضوانش

چه دلفریب بود در اوایل خرداد صفای دامن صحرا وکوهسارانش

طراوتی بچمن داده ابر اشک بهار خوش است طرف چمن بعد اب نیسانش

بچم عقل نگر لطف رود صافی را بآب رود ببین حسن نو بهارانش

سهند خرم وسبزش عسل ببار ارد بطیر خواسته زنبور کان بدامنش

حشم زحد شده برون و لبن بحد وفور برون ز وصف بود میوه فراوانش

نگر ببرج هلاگو و گردش دوران به اقتضای زمان شد به بیخ بنیانش

ببرج سرخ و سفیدوکبود حکمتهاست بخاک گشت مبدل کبود و ایوانش

کریم بیک ببرجی که ساخت بهره ندید کنون نموده طبیعت بخاک یکسانش

برو بسوی رصد خانه بین تو قدرت علم نظاره کن سوی غاری که نیست پایانش

مراغه منبع علم است ودانش و تقوی به این دلیل بود خواجه و دبستانش

بدامنش شده پرورده عارفان بسیار چو اوحدی که بود طایر غزلخوانش

بهر کجا که شود مرغ نغمه خوان بنواست چو ذاکر است وکریمی هزار دستانش

بهار امده شاهد شتاب بر لب جوی ببین گذشت زمان را بجویبارانش

وصف مراغه

گل گور گوزلیم باغ گلستاندی مراغه بیر پارچا صفا روضه رضواندی مراغه

دلچسبدی صافی چاینون ذوق و صفاسی چوخ گورملدی باغلارنون آب و هواسی

شیرین هولوسی .آلماسی .آمرودی.گیلاسی ذوق اهلینه بیر گزملی بستاندی مراغه

هر تکیه ده بر پادی ابوالفضلین عزاسی عاشقدی حسین آدینه قرباندی مراغه

وار بوردا کریمی کیمی نطاق سخنور فعلا اونون اشعارینه خواهاندی مراغه

 

رمضان گلدی

گینه گلدی رمضان هامی مسلمان اولاجاق
دین اسلام اوجالوب خلق نماز خوان اولاجاق

گله جق غیرتده فاسق، اولاجاق اهل تمیز
ایتدیقی معصیته جمـــــــله پشیمــان اولاجا ق

بیر محرمده چخوب شاهقلی بو مسجد دن
بیر ده بو آیده گلــــوب داخـل ایوان اولاجا ق

روزه سین میل ایلینلر چیخاجاقلار سفـره
ایله بیر هاموسی زوار خـــراسان اولاجا ق

او آداملار که ایدوب میلته چوخ جور وستم
هاموسی بیر گئجه ده قاری قرآن اولاجا ق

هیچ گناه اولماسا بسدور بیزه بو صوم وصلاه
قبر ایچینده بیزه او حائیل سوزان اولاجاق

سرعین

 مرضی دردی بدندن بدر ایلر سرعین

سنی بیر عمرگوزل بختور ایلر سرعین

ایلده بیر دفعه گلوب چیم گوزلیم بو سولارا

نظر ایله بو گلستاندا گزن آهو لارا

حُسنیده حوری غلمان چاتا بیلمز بو لارا

سنی عمرونده مبارک نظر ایلر سرعین

سرعین ذوق صفا سیروسیاحت یردی

خوش پذیرالیق ایلر خلقه ضیافت یردی

گزملی سویملی تفریح وظرافت یردی

غموی غصه وی دلدن بدر ایلر سرعین

سرعین گُللر آچوب رنگ به رنگ ایگلمه لی

دسته دسته بالا جیرانلاری وار ایستمه لی

سوبای السون سنی خونین جگر ایلر سرعین

هر نه شدٌ تلی مرض وار سرعین ایلر علاج

اودی کی ای بالا بازاری تاپوب بیله رواج

بیر تومن مرحمت ایت عکسوی سالسین فتوراج

سنی بیر عکسیله خوش مفتخر ایلر سرعین

(ساری سو)راحت ایدیر جمله مرضدن بدنی

(قره سو) بیل قره گوندن ایدر آسوده سنی

(ژنرال)آی بالا مرمر تک آغاردار قره نی

دوش (گامشلار گولونه)گور نه لر ایلر سرعین

چیمه سن (بش باجیلاردا)گوره سن لذّتینی

توکه سن (قهوه سویوندا)جانوین زحمتینی

گیت(پهینلی سویا) چکمه حکیمون منّتینی

پینییسلیندن سنه آرتوق اثر ایلر سرعین

(بیله دره)سویون ایچ معدوه درماندی او سو

اونا چاتماز کوکا کولا کاندا پپسی اسو

خور گون سندیری آبگوشت ییه سن آلتی طوسو

بله فکر ایلمه خرجون هدر ایلر سرعین

ای کریمی بالا سن اُت سرعیندن نظرون

سنه یوخ فایده سی پهلوینون رامسرون

گیت چورک فکرینه دوش یوخدی خبردن خبرون

کاسبا پولسوزا یولداش ضرر ایلر سرعین

 ریاست میزی

ایندیه‌تک بیله بیلوردم خانم

هرزه و هزیاندی ریاست میزی

ایندی اوتوردوم گورورم آی جانم

تخت سلیمان‌دی ریاست میزی

آخ نئجه راحت نئجه اگلشملی

هر نئجه یورقون اوتوسا دینجلی

چوخ یوموشاق سلقلی کیف سورملی

لایق سلطان‌دی ریاست میزی

تخت سلیمان‌دی ریاست میزی

میز نئجه میز اگلشنی جست ایدیر

رند و خرابات و قوی دست ایدیر

بی می و مینا آدامی مست ایدیر

رتبه‌ی شایان‌دی ریاست میزی

تخت سلیمان‌دی ریاست میزی

باخما کیچیک گورسنوری ظاهری

تک بیر آدامدان چوخا یوخدور یری

قوی الیوی آننوا باخ بیر چری

بیر یکه میدان‌دی ریاست میزی

تخت سلیمان‌دی ریاست میزی

میز نئجه میز نشعه‌ی ممتازی وار

موشک و جت تک گویه پروازی وار

باشدان آلور هوشی عجب گازی وار

محفل رندان‌دی ریاست میزی

تخت سلیمان‌دی ریاست میزی

ایلمه غم فخرایله شیش آی ماتان

من رئیس اولدوم کفیمه یوخ چاتان

صدر نشینم دگولم شارلاتان

دردیمه درماندی ریاست میزی

تخت سلیمان‌دی ریاست میزی

واردی عجب معجزه‌سی بو میزین

کور ایدیر اوّل‌ده جلیسین گوزین

نه جلو ایستور نه اوزنگی نه زین

مین‌ملی مادیاند‌دی ریاست میزی

تخت سلیمان‌دی ریاست میزی

دورسا حضوریمده اگر یوز نفر

سایمارام ایشکدی بولار یا بشر

یا بیر اوطاق کتلی یا بیر طویله خر

بیزلره یکساندی ریاست میزی

تخت سلیمان‌دی ریاست میزی

آخ نئجه میز وار نه گوزل نقشه‌سی

اَل قول آچانمور سویورام هر کسی

اُلدویرورم هر کیمی چخمور سسی

مسلخ انساندی ریاست میزی

تخت سلیمان‌دی ریاست میزی

سخت اولا قانون نئجه مثل دمیر

من اونی الده ایده‌رم چون خمیر

اولموشام ایندی ایله روشن ضمیر

مکتب عرفاندی ریاست میزی

تخت سلیمان‌دی ریاست میزی

میز نئجه میز جنگده ارابه‌دی

دللری یاندیرماقا خوش تابه‌دی

خون ضعیفان بیزه نوشابه‌دی

باشدان ایاق قاندی ریاست میزی

تخت سلیمان‌دی ریاست میزی

مؤمن اولا گبر اولا اسلام اولا

یوخ منه فرقی چاتارام قول قولا

دینی فدا ایلمیشم من پولا

دینله دشماندی ریاست میزی

تخت سلیمان‌دی ریاست میزی

بو مثلی خوش دیدی احمد کوسا

ارمنی‌لیق یاخشیدی کبلای موسا

لیک قیامتده پوخی چخماسا

مسند شیطان‌دی ریاست میزی

تخت سلیمان‌دی ریاست میزی

عصر بیزیم عرصه‌ی میدان بیزیم

قصر بیزیم حوری و غلمان بیزیم

نفس بیزیم نعمت الوان بیزیم

معرض طغیان‌دی ریاست میزی

تخت سلیمان‌دی ریاست میزی

ظالمی مظلوم ایلسم ایلرم

حاکمی محکوم ایلسم ایلرم

هر کسی مسموم ایلسم ایلرم

مرکز بهتاندی ریاست میزی

تخت سلیمان‌دی ریاست میزی

دائم الیمده ایکی مثقال قلم

ایسته‌سم عالملری ووررام به هم

پولدی پول اُستن یاغوری دم به دم

گورملی دکاندی ریاست میزی

تخت سلیمان‌دی ریاست میزی

ملتی مین مین سویورام دویمورام

دولته دوقوز قویورام دویمورام

گونده اوتوز رنگ بویورام دویمورام

حیله‌ی الواندی ریاست میزی

تخت سلیمان‌دی ریاست میزی

زال منم رستم دستان منم

گیو منم سام نریمان منم

اهرمنم خصم سلیمان منم

مسکن دیواندی ریاست میزی

تخت سلیمان‌دی ریاست میزی

دویمارام اصلاً بله سرمایه‌دن

یوخدی سراغیم خبر و آیه‌دن

سنماسین ای کاش بو میز پایه‌دن

ثروت و ساماندی ریاست میزی

تخت سلیمان‌دی ریاست میزی

بس دی کریمی سوزی قاتما سوزه

سورمه آتون داشلقا قیتر دوزه

چکمه داخی ملتی چوخدا اوزه

یازمالی عنوان‌دی ریاست میزی

تخت سلیمان‌دی ریاست میزی

مینی ژوب

نه گوزل خوش یاراشیرمش سنه ای جان مینی ژوب

حسنوه ویردی ترقی یوزه دوخسان مینی ژوب

ایوون آباد اولا عالمده مُد ایجاد ایلین

صبریمی طاقتمی ایلدی تالان مینی ژوب

نه دوتور قول قیچی نه یول یرینده یخوری

ایوون آباد ایلدون ایشلری آسان مینی ژوب

پسته‌نین اوستی آچیلدی کیلوسی برمی تومن

ایلدی آغ کلمین قیمتین ارزان مینی ژوب

گتور ای ساقی می نابله مست ایله منی

نازا قویما دورایاقه سنه قربان مینی ژوب

گجه گوردوم یوخودا امر معاشیم دوزه‌لوب

آلمشام قوینوما بیر شوخ بالا جیران مینی ژوب

اویانوب گوردوم اولوب خطه‌ی بغداد خراب

دیدیم ای وای سنه لعنت گله شیطان مینی ژوب

بیزیم آروادداباخور قزلارا کم کم اویانور

گینوب تازه بو بیمان قزی بیمان مینی ژوب

گر چی ایجاد ایلیوبدور بو مدی خارجه‌لی

واقعاً جای تعجبدی مسلمان مینی ژوب

آدی زهرا ننه‌سی فاطمه احمد آتاسی

اهل قرآنیدی بودلار قالوب عریان مینی ژوب

ننه‌سی بیر قیزا ایلوردی نصیحت کی قیزیم

یوزی قویلی اگیلوب سِیچمه بادمجان مینی ژوب

چوخ گوزتله بو لباسین بالا امنیتی یوخ

سنی بیردن گوره‌سن ایتدی پشیمان مینی ژوب

عمله گلسه متاعون داخی گلمز عمله

ایدور اوضاعوی بالمره پریشان مینی ژوب

خیلی مشگلدی اوزین ساخلیا ات گورسه پشیک

دوزه بیلمز گوره پول‌سوز سوبای اوغلان مینی ژوب

قویروغا مشتری یوخ قصابین احوالنه باخ

اوزماندان کی اولوب بیله فراوان مینی ژوب

نه قدر مد گوروسن خارجه سوغاتیدی لیک

بولارین جمله‌سی تک بیریانا بیریان مینی ژوب

اللرون وار اولا خیاطه خانم اُلمیه‌سن

همی دالدان یاراشیر همده قباقدان مینی ژوب

هوسون اولسا گیداخ انزلی‌یه رامسره

لب دریاده ایدر گور نجه طوفان مینی ژوب

کیم خدایا گوره‌سن آچدی بو خلقین یوزینی

نه حیا قویدی نه ناموس نه وجدان مینی ژوب

آدین اسلام قویان خارجه تقلید ایلمز

پوزوب اسلامی نه دین قویدی نه ایمان مینی ژوب

یل اسنده گیدیری فوری گوبکدن یوخاری

گزلین اسراری ایدیر ملته اعلان مینی ژوب

دین و ملت اشاقا گیتدی اتکلر یوخاری

تا گوراخ هاردا ویرر سئرینه پایان مینی ژوب

اقتصاد اهلیدی ایرانلار اسراف ایلمز

همی کم خرجیدی هم مفته هم ارزان مینی ژوب

حیف اولا بو قوجالار مدلاری رسوا ایلدی

قورومش بود قره ایرگنملی باخ یان مینی ژوب

بیزیم ایشکده بیر آز قوشقونا تغییر ویروب

دالی یانمش بودا ایستور اولا حیوان مینی ژوب

خردالوب خردالوب آخر تومان اولدی پاچا بند

قسالوب قسالوب ایتدی دونی دوران مینی ژوب

ای کریمی مدووی سنده دگیش اول ژیگولی

شعر و شاعر مینی ژوب دفتر دیوان مینی ژوب

 ویرون رای منه

ایها الناس ویرون همتلن رای منه

منی وادارایلیون شرکت ایدوم انجمنه

شاعرم شعریله هر مطلبی تحریر ایده‌رم

قاری‌یم آیه‌نی اوز شائنیمه تفسیر ایده‌رم

سیل یخان ایولری بیر هفته‌ده تعمیر ایده‌رم

لادیمز حکمیمه مستاجر اولا یا سکنه

ایها الناس ویرون رای منه

قویمارام شهریده بیر ذره کثافت اثری

گرک آسفالت اولونا شهریمیزین کوچه‌لری

گوره‌سوز اوندا که آیا سوزیمون وار کسری

من فقط ماهه باش اگسم اگرم انجمه‌نه

ایها الناس ویرون رای منه

قویمارام شهریمیزین بودجه‌سی گیتسون هدره

قویمارام ظلم اولا بیر مو قدری بیر نفره

ییرم شام نهارا یاغ دوگی صبحانه کره

اوزه‌رم باشنی هر کیم سولسه هل پسنه

ایها الناس ویرون رای منه

ایشی ترتیبه سالوم شهره ویروم نظم و نظام

مد امروزیله تعمیر اولا مسجدله حمام

ناقصاتی ایلیوم بیر ایلین عرضینده تمام

هامی بیر دفعه دیسون احسن او رای حسنه

ایها الناس ویرون رای منه

نیه گورکان آلا قبرین بیرینه اللی تومن

نیه دینمور بو جماعت ایشه یوخ بیر یتیشن

بله اولسا قوجا دنیانی دوتار اولماز الن

اُلی گر اوز باشنا اولسا تریخلار کفنه

ایها الناس ویرون رای منه

نه روا شایع اولا شهریده مشروب و زنا

دولدورا تکیه و مسجدلری تذویر و ریا

قویمارام رایج اولا بیر بله تنزیل و ربا

خلق ایچینده گنه مرسوم اولی قرض‌الحسنه

ایها الناس ویرون رای منه

چوره‌گی میوه‌نی بازاردا فراوان ایده‌رم

هویجین آغ کلمین قیمتین ارزان ایده‌رم

اتی قصاب باها ساتسا اونی تاوان ایده‌رم

باسارام ایگنه‌یین‌لر قوسار آتدان تبنه

ایها الناس ویرون رای منه

شاعرم منده قویون صنف رجاله قوشولوم

کارت و پارت و پلوویله پولوم اولسون خوش اولوم

سوخولوم باند ریاستلره غمدن قوتولوم

نولی بش گون قویاسوز سرور اولام مرد و زنه

ایها الناس ویرون رای منه

قویمارام کتلیه آشپز قوخوموش کفته ویره

بیری اصنافی سویوب جنسین آلا سفته ویره

اوغلانا شوخ مه‌مه قزلار اُپوشی مفته ویره

بوسه‌نین هر جوتی قاخسون گرک آتمیش تومنه

ایها الناس ویرون رای منه

منی شهر اهلی تانور من بو ایشین ماهری‌یم

رئسا تک تکی موسا اولا من سامری‌یم

نابلد کی دگولم شهریویزین شاعری‌یم

یوخ خیانت نظریم دولته دینه وطنه

ایها الناس ویرون رای منه

سویرم منده چاتام منصبه آدیم یکله

یاغلی مجانی پلولارییه قارنیم دیکله

ساری رنگیم دورولا بو تیشی قیشلارکوکله

یاخشیلیق دوره سیدی سن منه یان منده سنه

ایها الناس ویرون رای منه

من اگر رای آپارام خوش سیزون احوالیزه

مرحبا طالعوزه شانسوزا اقبالویزا

جد و جهدیله یتورم سیزی آمالویزه

دده سوز سیز منه عورتلریویز مثل ننه

ایها الناس ویرون رای منه

حاضرم هر ایشوز اولسا دیمیون دال چاتارام

بله فکر ایلمیون سیزلری گوزدن آتارام

یری گورمز گوزوم اوندا باشیمی دوز دوتارام

دیمرم گیچدی سودان ایشکیم ایندی منه نه

ایها الناس ویرون رای منه

گله لازمدی حمامدا سو پولی بش قرانا

تا گیده سطح نظافت یوخاری خلق اویانا

شهر حسرت قالا قیللی ... کیرلی دابانا

یاسمن گونده ورا شانه او زلف سمنه

ایها الناس ویرون رای منه

نولی بش گونده کریمی اولا بیر جمعه آقا

داراشا بوغلی پشیک تک بالا قیماقه یاغا

بولیسوز هر ایشیویزده دوشرم من قباقا

ملکم ایندی من اوندا دونرم اهریمنه

ایها الناس ویرون رای منه

 

  مریض و عزرائیلین مکالمه سی

عزرائیل

 

منی مامور ایلیوب خالق سبحان حــاج آقا

قبض روح ایتماقا گلدیم سنی الان حـاج آقا

ویردی مستنطق رحلت منه فرمان حـاج آقا

وقت قورتاردی نفس چکماقا قادر دگوسن

آلورام جانیوی سس چکماقا قادر دگسن

 

جواب مریض

 

آی علی آی ولی آی وای دورن اوغلان ایاقا

کیمدی بو بی ادبانه بیله گیردی اطاقا

بو صفتده بشر اولماز باشی بنزیر بالاقا

نه سلام ایتدی نه تعظیم عجب هیوره دی

چاتدادی باغریم اماندی بونه بد منظره دی

عزرائیل

 

کیشی قشقیرما علی یا ولی گورمزله منی

منه مردم ملک الموت دیللر علنی

گلمیشم من آپارام محضر معبوده سنی

داخی بوندان بویانا بیر کسه آمر دگوسن

وقت قورتاردی نفس چکماقا قادر دگوسن

مریض

 

منی عفو ایله داداش بیلمدیم عزرائیل سن

شکر لله سن اوزون بیر ملک کامل سن

خدمتون فرضیدی پیک ملک عادل سن

اوتی بیر چای گتورسونلر هله تعجیل ایلمه

صبر هر ایشده گوزلدور بیله تعجیل ایلمه

عزرائیل

 

کیشی اوخشاتما منی قونشووز عبدالکریمه

من بو دنیا سولارین ایچمرم افسانه دیمه

من طلبکار دگولم چوخ دیله توتما سریمه

چوخ قالورسان هله بو دیللره ماهر دگوسن

وقت قورتاردی نفس چکماقا قادر دگوسن

مریض

 

سنه بنزر بیری گلمیشدی بیر آز بوندان ازل

چوخ خوش اخلاق صداقتلی نظافتلی گوزل

کیمیمیش او سنه قربان اولوم ای پیک اجل؟

نه دیوم عینا اونون باشی سنون باشیودی

بولمرم اوغـلویدی یا بالا قارداشیویدی

عزرائیل

 

عمو دکتوردی او ، اوغلوم دگی ، یولداشدی منه

قبض روح ایتماقا یولداش ندی قارداشدی منه

خیلی ماهردی بو ایشده آتادان باشدی منه

گوردوم اما سن اونا قوشمالی خاسر دگوسن

وقت قورتاردی نفس چکماقا قادر دگوسن

مریض

 

دوزدی مامور ایلیوبدور سنی خلاق کریم

بلکه سن سهو ایلیوبسن او دیه ن من دگلم

هله مندن قوجلار وار نه روادور من ئولم

گرچه زحمتدی قیت بیر سوروش اوندان صورا گل

آدیمی شغلیمی گیت بیر سوروش اوندان صورا گل

عزرائیل

 

کـیشی آغـریتدی منیم باشیمی بو طول کلام

اللی میـن ایل جان آلان سهو ایلمز اولما عوام

عمـووی عمــه وی اجدادیوی بیر بیر تانیرام

سن مگر مصطفی خان اوغلی مظاهر دگیسن؟

وقـت قورتـاردی نفس چکماقا قادر دگوسن

مریض

 

من دیدیم اوغلومی داماد ایدرم اتمه میشم

مشهـده کرب وبـلایه گیدرم گیـتمه میشم

تومنی بیر قـرانا ویـر مـاقی ترکیدممیشم

هـــله آغـزیم منیم ایستور تازاجا آشه یته

دگول انصاف بو تئز لقدا باشیم داشه داشه یته

هله اگلش من ئولوم هر نه سورسن گتیسین

منقل حاضردی اگر نشئه چکر سن گتیسین

آبجوی پیپسی کولا کنیاک ایچرسن گتیسین

مندن اوچ یوز تومن آل ویر منه مهلت ایکی ایل

باشا باش ایـلیوم آســوده عبـادت ایکی ایل

عزرائیل

 

کیشی سارساخلاما نشئه ندی تریاک ندی

آبجو نمندی ایشک کیشی کنیاک ندی

قانمیوبسان هله مردار ندور پاک ندی

قانماسان چون ایله بیر فاسق فاجر دگوسن

وقت قورتاردی نفس چکماقا قادر دگوسن

من او مــامور اداره دگــولم رشـوه ییم

بش تومن پولدان اتور بیر کسی بدبخت ایلیم

بله آســوده اوزانما عـمو مــن گتمه لیم

ناقصون واردی مگر گیتماقا حاضر دگوسن

وقت قورتاردی نفس چکماقا قادر دگوسن

مریض

 

ناقصیم چوخدی عزیزیم اولا مــشگلدی تمام

سن گیدوب بنده دن عرض ایله خداونده سلام

اوزی انصاف ایلسون وار ایکی اوچ خردا بالام

هـــله من تازه جوانم ایله گون گورمه مشم

دنیادان دویمامشام بیر ایله کیف سورمه میشم

عزرائیل

 

کیمدی ایشک کیشی غلمان ویره یا حور سنه

حـوری معروفه دگول که بـاش اگه هر گلنه

سوخاجاق مالـک دوزخ گـتووه اودلی شنه

غـرق سن معصیته طیب و طاهر دگوسن

وقت قورتاردی نفس چکماقا قادر دگوسن

مریض

 

دیمه لی ماک دوزخده تیکـوب گوز یولـوما

گور بو الله نچه مامور دوزوب صـاق صولوما

بیر نـفر اینجینده بولـمز منی منـت پولوما

پولونان مالک نیرانیده آرام ایدرم

گیدرم جنته حوریلریده رام ایدرم

عزرائیل

 

داخی بوندان صورا مالک دگیسن اوز پولووا

گـورسن اهـل عیالون دوزلوب صاق صولوا

ییه جاقلار ، ایچه جاقلار، سچاجاقلار یالووا

بو ایوین دخلینه یاخرجینه ناظر دگوسن

وقت قورتاردی نفس چکماقا قادر دگوسن

ایش اورا ایتدی ایو اهلی هاموسی آغلادیـلار

حاجینین دستمالینان گوزلرینی باغلادیــلار

بعضی قاچدی کفنه بعضیسی سو داغلادیــلار

دست قدرت حاجینون تختینی تابوت ایلدی

ناز پـرور بدنین جانـوره قـوت ایـلدی

دعوا باشلاندی مال اوسته حاجینون وای حالنا

باجی قـارداشه دیـور :ده ده ویــن سقالنا

کــوره کن گه یالـنا سـچار گـهی یوپالینا

نچه گوندن صورا ارواد گیدوب اوزگه اره

بیر نفر گـلدی تصاحـب ایلدی سیم وزره

خوش اوشخصه اوزی اعمالینی اصلاح ایلیه

ارجعی لفظین ایشید جک اوزی لبیک دیه

خــلعت آخرتی اگـنینه عــزتله گـیه

روبر اولدی همان لحظه که عزرائیلیلن

گوله عزرائیلی گورجک آلا جانین گلیلن

 

باکو سفر نامه سی

اوتایین جلفاسینا دوشدی گؤزوم	بولمورم هیچ نه حالا قالدیم اؤزوم
ائیله‏دیم سمت گلستانه نظر	گؤزیاشیم آخدی، دوشوب جانه شرر
او گلستان غمیمی ائتدی تازا	گؤزیمون یاشینی قاتدیم آرازا
دولدی قلبیمده اولان قان گؤزومه	آتشه دوندی گلستان گؤزومه
دئدیم ای ناری گلستان ائلیین	درد مظلوملارا درمان ائلیین
لطف ائله روحیمی قئیتر بدنه	آیریلان توپراقی وصل ائت وطنه
کیم آیوردی سری تندن وطنیم؟	منی سندن، سنی مندن وطنیم؟
آخ! نه‏قدری آخاجاقسان آرازیم	دورنالار تک باخاجاقسان آرازیم
فتحعلی شاه قرا اولسون اوزون	یاخشی ساتدین وطنی گئتدین اؤزون
شل اولا انگلیسه قاب یالیان	ترکمن چای سندین امضالیان
محو اولا ملّته نفرت یارادان	گؤزل ایرانیمی‏ بؤلدی آرادان
ائله که کئچدیق آرازدان اویانا	اولدی اوّل یئریمیز خسته خانا
مرزبان بیر روسیدی، بیر کؤپک اوف!	ساری توک، گؤزلری گؤی، آدی ژوکوف
بیر چاخیر خومچاسی، بیر مرد عبوس	دئدیم آی ذاتوه لعنت بئله روس
پرآچوب قرقی تک آشدیق حاصاری	جلفانی، نهره‏می، چشمه‏باساری
ماشین القصه بیزی گتدی جانا	یئتیشیب قافله‏میز نخجوانا...
ایچری یاخشی کثافت خانادی	دئدیم اوغلان بورا محنت خانادی
نه هتل؟ پرده جریق، پلّه اوچوق	غذا یوخ، آفتافا یوخ، دستشو یوق
شهریده اولدی گؤزل گشت و گذار	بو گؤروشدن الیمه گلدی عیار...
اولارین روس دگیشوب دبلرینی	دؤندروب ترسیه مذهبلرینی
نه نماز واردی، اولاردا نه نیاز	اولسادا گر یوزه اون، بلکه‏ده آز
بیزی شاعرلر آپاردی قاطارا	بیزده چوخ دل آغیز ائتدوق اولارا
شعرادن بیری من‏باب ثواب	کادو گتدی بیزه، بیر شیشه شراب!
دئدوق احسن دینوه، ایمانووا !!	کادووا، حرمتوه، احسانووا !!
اتوووه اندامووا گوزتاشووا	بو نئجه تحفه‏دی، دگسین باشووا
الغرض سؤز آز اولا، تئز قوتولا	باکویا قافله‏میز دوشدی یولا
نه قاطار؟ بولدی سویوندان چاخیری	وودکا سئل تک کوپه‏لردن آخیری
باشلادیم بیر کیشی‏یه عرضِ گله	ای مسلمان! نییه بس وضع بئله؟...
دئدی بوغموش بیزی قارداش خفقان	دین و مذهب سؤزی گئتمیش آرادان
دئدیم ایران، داشووا توپراقووا	قربانام داغدان اوجا بایراقووا
مرحبا نظمیوه، آبادلقیوا	شرعی قانونوه آزادلقووا
الغرض بئینیمی چاتداتدی قاطار	ساعت اوندا باکویا چاتدی قطار
باکویا باخدیم اورک دؤندی قانا	باش قالوب ‏هاردا، دوشوب جان ‏هایانا
اوره گیم یاندی گؤزل توپراقیما	دست ظلم‏ایله بؤلونمش باغیما
وای گؤزل اردوبادیم، نخجوانیم	شکی، شیروان، شماخی، لنکرانیم
وطنی ائتدیله قربانلیق اتی	بؤلدولر، پایلادیلار مملکتی
هر گلن کشوری حرّاج ائله‏دی	بیزی بیگانه‏یه محتاج ائله‏دی...
هتله بیرده قئییتدوق ناهارا	قسمته باخ! بیز هارا، باکو هارا
او گؤزللیقدا هتل ده نه ثمر	یوخیدی نظم و نظافتدن اثر
توالتده سویی یوخ، بیلمه‏لیسن	اؤزیوی کاغذیلن سیلمه‏لیسن!
باکی جمهوریسینون باش وزیری	طنز و تفریح‏ده یوخدور نظیری
شاما چکدی هتله قافله‏نی	آچدی بیر بحث ‏سیاسی علنی
سؤز اوزون، سالدی بیزی حوصله‏دن	چوخ قالوبلار دالیا مسئله‏دن
گاهی ملعون ستالین، گاهی لنین	نه بولاردا قویوب ایمان و نه دین
قورباچوف بیر تیکه دوتموش اولارا	ایمدی حسرتله قالوبلار آوارا
گرچه خودمختار اولوبلار نه ثمر	اختیاردان نه خبر وار نه اثر
ترکیه قابلیوب اوز سوقاتینی	جمله مکتوبلاری اولموش لاتینی
او وئروب نقشة پرچملرینی!	اقتصاد آرتیق ائدیب غملرینی
نه باکی، شیطانین آل‏وئر بازاری	تهرانین شاه زمانی لاله‏زاری
شوروی پیس حالا سالمیش باکینی	نجسدن نجس ائلیوبدی خاکینی
فقط اسلام آدی دللرده قالوب	هامی احکام خدا یئرده قالوب
رقص و آواز و زنا، فسق و فجور	قاریشوب بیربیرینه جوربه جور
ایکی شِی‏دن یوخودی نام و نشان	بیر نمازدان، بیری ده آفتافادان...
الغرض، مؤمنه زنداندی باکی!	عیّاشا روضة رضواندی باکی!
روس آلوبدور باکی‏نین مذهبینی	ترکیه غارت ائدوب مکتبینی...
صبح یکشنبه، یئتوب کوچ رحیل	بختمیز نخجوانا اولدی دلیل...
آرازی قافله‏میز آشدی گنه	حمد اولا خالقه، گلدوق وطنه
ائله که کورپونی کئچدوق بو تایا	وطنین داشلارین اوخشاتدیق آیا
دوشوب اوپدوک وطنین توپراقینی	یوزه چکدیک او گؤزل بایراقینی

تاریخ ارسال پست: پنجشنبه 23 فروردین 1403 ساعت: 22:16
برچسب ها : سایت,ارس,رزبلاگ,